ළමා සාහිත්‍ය කෘතියක් ලෙසින් අතිශයින් ජනප්‍රිය අපේ රටේ පරම්පරා ගණනාවක ළමුන්ගේ සිත් බැදගත් “මඩොල් දූව” කෘතිය සම්බන්ධව මතකයට නැගීමක් මේ..
මඩොල් දූව වර්ෂ 1947 දී කොග්ගල ප්‍රාඥයා යනුවෙන් විරුදාවලිය ලත් හෙළයේ මහා ගත්කරු මාර්ටින් වික්‍රමසිංහ විසින් රචිත අගනා කෘතියකි.
එහි ප්‍රථම මුද්‍රණය වර්ෂ 1947 සිදු වු අතර පසුකාලීනව එය ඉංශ්‍රිසි, රුසියානු,චීන,ජපන් ඇතුළු භාෂා කීපයකට පරිවර්තනය වී ඇත.
උපාලි ගිනිවැල්ල නම් පිරිමි දරුවා ජින්නා ඇතුළු ඔහුගේ මිතුරන් සමග එක්ව කරන දඩබ්බර වික්‍රමයන් හා පසුව ඔවුන් මඩොල් දූව නම් වූ දූපත සොයාගොස් එහි ජිවත්වීමට දරන උත්සාහය මෙහි රසවත්ව දිග හැරෙයි.
වර්ෂ 1890 කාලවකවානුව සහ එම කාලයේ ශ්‍රී ලංකාවේ මිනිසුන්ගේ ජන ජිවිතය හා සංස්කෘතික ලක්ෂණ මෙම කෘතියට පාදක වී ඇත.
පසුකාලයේදි එනම් වර්ෂ 1976දි ශ්‍රී ලාංකික සිනමාවේ පුරෝගාමි සුවිශේෂි චරිතයක් වූ ආචාර්ය ලෙස්ටර් ජේම්ස් පීරිස් ශූරින් විසින් මඩොල් දූව කෘතිය චිත්‍රපටයක් ලෙසින් රිදී තිරයට ගෙන එන ලදි.
මෙහි ජනප්‍රිය නළු අජිත් ජිනදාස මහතා විසින් උපාලි ගිනිවැල්ලගේ චරිතය රගදක්වන ලද අතර පද්මසේන අතුකෝරළ, ජෝ අබේවික්‍රම ආදි අප රටෙහි ප්‍රකට නළුවන් රුසක් එයට රංගනයෙන් දායක වී ඇත. මෙය සංගීතයෙන් රසවත් කරන ලද්දේ විශාරද ආචාර්ය පණ්ඩිත් ඩබ්ලිව්.ඩී.අමරදේව ශූරින් විසිනි.මඩොල් දූව කෘතිය අද බොහෝ වැඩිහිටියන්ගේත් ළමුන්ගේත් පොතපත කියවීමට මෙන්ම ලිවීමට ඇති ආශාව මුලින්ම ඇති කල ළමා කාලයේ කාගේත් සොදුරු මතකයකි.
ඔබට මතකද, උපාලි හා ජින්නා විසින් හාල්, තුනපහ පොල් ඔරුවෙහි බැදගෙන මඩොල් දූව කරා ගිය වික්‍රමාන්විත ගමනට ළමා කාලයේ අපට ඇති වු ආශාව…වර්ෂ ගණනාවක් ගතවී ඇතත් තවමත් අපේ සිත් තුළ ජිවත්වෙන උපාලි හා ජින්නා සදාකාලික චරිත දෙකක් වී අවසන්…
ඔබේ දුවට පුතාට වගේම ඔබටත් ඔඩොල් දූවේ උපාලි හා ජින්නා සමග ඔරු පැද ඇවිදින්නට නැවතත් හොද අවස්ථාවක් කර ගන්නට මේ මතක් කිරිම ඔබට උදව්වක් වේවි…
මඩොල්දූව සිනමාපටයට ආචාර්ය අමරදේවයන් විසින් සංගීතවත් කරන ලද සුනිල් ආරියරත්නයන් විසින් පද ගැලපු සංගීතවේදි වික්ටර් රත්නායකයන් ගායනා කරන ලද ගීතයක කොටසකින් මෙම සටහන අවසන් කරමු.
මූදූ හතක් එහා ඔරු පදින්න
එන්න යාළුවේ..
අපිම අපේ ලොවක් සොයාගන්න
එන්න යාළුවේ…
කොහේද කොහේද අපේ ලොවක්…..
